Кустуурга дьахтар кэмитиэтин саҥа састааба үлэтин саҕалаата

Эбээн Бытантай улууһун Кустуур нэһилиэгэр олохтоох дьаһалта уонна Кустуур орто оскуолатын социальнай педагога Федора Гатилова эдэр ийэлэри көҕүлээн түмэ тартылар.

Маҥнайгы мунньах сүнньүнэн нэһилиэк ийэлэрэ кэмитиэт саҥа састаабын куолас быһаарыытынан таллылар. Ол курдук, түмсүү бэрэссэдээтэлинэн олохтоох бэтэринээринэй быраас Оксана Попова ананна, солбуйааччынан кондитерынан үлэлиир Елена Михаханова, сэкирэтээринэн «Маранга» этнокултуурунай киин үлэһитэ Дария Самойлова талыллан, күүстээх хамаанда түмсэн нэһилиэк уопсастыбаннай үлэтин үмүрү тутуохтара диэн бүк эрэнэбит.

Дьахтар кэмитиэтин саҥа састаабын талыы кэнниттэн эдэр ийэлэр сыллааҕы былааны ылынан, туох-хайдах үлэ барара ордугун кэпсэтистилэр.

Түмсүү бастакы ыыппыт үлэтинэн Саха сиригэр Ийэ, Арассыыйаҕа Аҕа күнүнэн «Маранга» этнокултуурунай киини кытары элбэх оҕолоох дьиэ кэргэттэри өйүүр сыаллаах «Үтүө санаа аахсыйатын» тэрийдилэр.

Онон, сырдык саҕалааһын баар, үтүө түмүк тахсыа диэн олохтоохтор түмсүү үлэтин биһирээтилэр. Саҥа үлэлээн эрэр түмсүүгэ үрдүк ситиһиилэри, түмүктээх үлэлэри баҕарабыт.

Подробнее: https://xn--80aaaab4c0aktncdal7i.xn--p1ai/article/27807

Ссылка:  https://disk.yandex.ru/a/W3fD_jnB0Vi7Lg